សន្ដិសុខសង្គម

ឆែកឆេរទីតាំងការដ្ឋានរបស់ជនជាតិចិន១កន្លែងនៅស្រុករតនមណ្ឌលខេត្តបាត់ដំបង៖ឃើញឈើប្រណិតនិងរថយន្តចង្កូតស្តាំជាច្រើន

ដោយ : បន្ទាយ 

បាត់ដំបង ៖ កម្លាំងកងរាជអាវុធហត្ថខេត្តបាត់ដំបង ដឹកនាំដោយលោក វរសេនីយ៍ឯក ជា តារា មេបញ្ជាការរងកងរាជអាវុធហត្ថ ដោយមានការសម្របសម្រួលពីព្រះរាជអាជ្ញារង ទុត វីនីត និងកម្លាំងគយ កម្លាំងរដ្ឋបាលព្រៃឈើ កម្លាំងអាជ្ញាធរភូមិ-ឃុំ បានចុះត្រួតពិនិត្យទីតាំងការដ្ឋានជនជាតិចិនមួយកន្លែងកាលពីវេលាម៉ោង៩និង០០នាទី ថ្ងៃទី២២ ខែមីនា ឆ្នាំ២០២៥ ស្ថិតនៅភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង ។

បញ្ជាការដ្ឋានកងរាជអាវុធហត្ថខេត្តបាត់ដំបង បានឲ្យដឹងថា៖ នាល្ងាចថ្ងៃទី២២ ខែមីនា ឆ្នាំ២០២៥ កិច្ចប្រតិបត្តិការត្រួតពិនិត្យទីតាំងការដ្ឋានរបស់ជនជាតិចិនខាងលើ ដែលមានម្ចាស់ ឈ្មោះ លីយ៉ុងកួយ ភេទប្រុស អាយុ៥៥ឆ្នាំ ជាជនជាតិចិន និងអ្នកតំណាងឈ្មោះ វ៉ាន់ សុជាតា ភេទស្រីអាយុ៣៣ឆ្នាំ មុខរបរគណនេយ្យ មានទីលំនៅភូមិព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។

ជាមួយកិច្ចប្រតិបត្តិការខាងលើនេះ មន្ត្រីជំនាញបានរកឃើញក្បាលរថយន្តសណ្តោងរ៉ឺមកចង្កូតស្ដាំចំនួន១៤គ្រឿង , រថយន្តទេសចរណ៍ចម្រុះចង្កូតស្តាំ ចំនួន ១០គ្រឿង , រ៉ឺមកសណ្តោងមានសាទែន ចំនួន២គ្រឿង , សឺមីរ៉ឺមក ចំនួន៤ គ្រឿង , ឧបករណ៍សម្រាប់ដាប់លេខតួរថយន្ត ចំនួន ១ឈុត និងឈើមួយចំនួនផងដែរ។

ក្រោយពីធ្វើការត្រួតពិនិត្យរួចរាល់ រថយន្តចង្កូតស្តាំខាងលើត្រូវបានប្រគល់ឲ្យគយនិងរដ្ឋាករដើម្បីចាត់ការតាមនីតិវិធី ។ ចំណែកឈើបានប្រគល់ឲ្យរដ្ឋបាលព្រៃឈើចាត់ការតាមនីតិវិធី៕